រដ្ឋបាលក្រុងសិរីសោភ័ណ គឺជាក្រុងដំបូងគេ បានធ្វើតេស្តរកសារធាតុញៀនទៅលើមន្ត្រីរាជការក្រុមប្រឹក្សាក្រុង សង្កាត់ទាំង៧ លទ្ធផលអវិជ្ជាមានទាំងអស់
បន្ទាយមានជ័យ ៖ ក្រុងសិរីសោភ័ណ គឺជាក្រុងដំបូងគេ ក្នុងចំណោមក្រុង-ស្រុកទាំង៩ ទូទាំងខេត្តបន្ទាយមានជ័យ បានធ្វើតេស្តរកសារធាតុញៀនទៅលើមន្ត្រីរាជការនៃរដ្ឋបាលក្រុង ក្រុមប្រឹក្សាក្រុង ក្រុបឹក្សាសង្កាត់ទាំង៧នៅទូទាំងក្រុង នៅព្រឹកថ្ងៃទី២៥ ខែមីនា ឆ្នាំ២០២៤អនុវត្តនូវបទបញ្ជារបស់ប្រមុខរាជរដ្ឋាភិបាលកម្ពុជា ក្រោមការដឹកនាំប្រកបដោយភាពឈ្លាសវៃរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ។
មន្ត្រីរាជការនៃរដ្ឋបាលក្រុងសិរីសោភ័ណ ក៏បានបង្ហាញអំពីការសាទរ និងគាំទ្រចំពោះនូវបទបញ្ជារបស់ប្រមុខរដ្ឋាភិបាលកម្ពុជា ក្នុងការធ្វើតេស្តរកសារធាតុញៀនទៅលើមន្ត្រីរាជការ ដោយពួកគាត់បានបង្ហាញអំពីការគាំទ្រ និងស្ម័គ្រចិត្តចូលរួមធ្វើតេស្ត ដើម្បីបញ្ជាក់អំពីភាពស្អាតស្អំរបស់ខ្លួនដែលជាមន្ត្រីរាជការផងដែរ។
លោក ស្រេង សុផល អភិបាលក្រុងសិរីសោភ័ណ ក៏បានបញ្ជាក់ផងដែរថា ការធ្វើតេស្តនេះ អនុវត្តអនុសាសន៍ដ៏ខ្ពង់ខ្ពស់របស់ប្រមុខរាជរដ្ឋាភិបាលកម្ពុជា ដែលក្នុងនោះមន្ត្រីរាជការក្រុមប្រឹក្សាក្រុង ក្រុមប្រឹក្សាសង្កាត់ ទូទាំងសង្កាត់ទាំង៧ ក្នុងក្រុង មានសរុបចំនួន១៧៦នាក់/ស្រី៦៧នាក់(ជាលទ្ធផលអវិជ្ជមានទាំងអស់)៕
ព័ត៌មានជាច្រើនទៀតសម្រាប់អ្នក
